D’fhógair an tAire Cultúir, Cumarsáide agus Spóirt, Patrick O’Donovan TD, gur roghnaíodh na tionscadail rathúla tar éis próiseas glaonna agus meastóireachta oscailte. Tacóidh an maoiniú le heagraíochtaí a sholáthraíonn cláir chruthaitheacha a chuireann leanaí agus daoine óga i gcroílár an phróisis chruthaithigh, agus ag an am céanna cinnteoidh sé go mbeidh níos mó deiseanna acu siúd a bhfuil bacainní ar rannpháirtíocht rompu páirt a ghlacadh.

Tá an infheistíocht á soláthar trí dhá shraith chistiúcháin: an Ciste um Chothú na hÓige Cruthaithí agus an Ciste um Chothú na hÓige Cruthaithí: Oileán Comhroinnte.

Tacú leis an gcruthaitheacht do gach duine óg

Gheobhaidh naoi dtionscadal níos mó ná €733,000 tríd an gCiste um Chothú na hÓige Cruthaithí chun leanúint de rath an chláir phíolótaigh (2023–2025). Agus iad ag feidhmiú go dtí deireadh 2027, tá na tionscadail sin deartha go sonrach chun leanaí agus daoine óga is annamh a chloistear a mhealladh, ar leanaí agus daoine óga iad a bhféadfadh bacainní a bheith orthu maidir le rochtain a fháil ar dheiseanna cruthaitheacha.

Cuimsíonn na tionscnaimh mhaoinithe raon leathan disciplíní cruthaitheacha, lena n-áirítear sorcas, scríbhneoireacht amhrán, beochan, scéalaíocht dhigiteach agus na hamharcealaíona lena gcruthaítear timpeallachtaí cuimsitheacha inar féidir le daoine óga muinín a fhorbairt, iad féin a chur in iúl agus a n-acmhainneacht chruthaitheach a bhaint amach.

I measc na dtionscadal ar éirigh leo tá:

• Fáilte go dtí mo dhomhan: Glór thar Fhocail, faoi stiúir Ollscoil Teicneolaíochta an Atlantaigh, a thacóidh le daoine óga neamhbhriathartha agus faoi mhíchumas i nDún na nGall agus i nGaillimh trí eispéiris chruthaitheacha chéadfacha.
• Déanta as Focail, faoi stiúir Draíocht, a oibreoidh le leanaí agus le daoine óga a bhfuil dúshláin mheabhairshláinte rompu i mBaile Átha Cliath, ag cabhrú leo an teanga a iompú ina filíocht, ina taibhiú, ina híomhánna agus ina siombailí.

Naisc a thógáil ar fud an oileáin

Bronnadh €1.46 milliún eile tríd an gCiste um Chothú na hÓige Cruthaithí: Snáithe Oileáin Chomhroinnte, arna mhaoiniú ag Tionscnamh Oileáin Chomhroinnte an Rialtais.

Beidh sé thionscadal comhpháirtíochta trasteorann ar siúl go dtí 2028, ina dtabharfar le chéile daoine óga ó phobail Thuaidh agus Theas chun comhoibriú trí thaithí chruthaitheach chomhroinnte. Tá sé mar aidhm ag na tionscadail tuiscint a chothú, caidrimh a neartú agus dóchas a spreagadh don todhchaí trí ghníomhaíochtaí lena n-áirítear scríbhneoireacht súgartha, teicstílí, na hamharcealaíona agus cleachtais chruthaitheacha eile.

Ceann de na tionscnaimh rathúla, Glórtha Fuaite: Tabharfaidh Clár Teicstílí Óige Comhroinnte, faoi stiúir Inspiring Yarns CIC, daoine óga ón gCabhán agus ón Dún le chéile chun féiniúlacht, muintearas agus pobal a fhiosrú trí ealaín theicstíle chomhoibríoch.

Infheistíocht a dhéanamh sa chéad ghlúin eile

Agus an maoiniú á fhógairt aige, dúirt an tAire O’Donovan:

“Is é an cuspóir atá le Clár Éire Ildánach ná daoine, áiteanna agus pobail, a spreagadh agus a athrú tríd an gcruthaitheacht. Is léiriú é fógra an lae inniu, maidir le 15 tionscadal rathúla, ar thiomantas leanúnach ar son na físe, go mbeadh an deis ag gach duine, beag beann ar a gcúinsí, barr a gcumais chruthaitheachta a bhaint amach.”

Dúirt sé freisin:

“Tríd an infheistíocht shuntasach ó Chiste an Oileáin Chomhroinnte, cruthaíonn an snáithe seo den Chlár deiseanna do dhaoine óga, ó thuaidh agus ó dheas, teagmháil a dhéanamh le daoine nach mbuailfidh siad leo murach sin, ionas gur féidir leo smaointe cruthaitheacha a fhiosrú le chéile agus iad a thabhairt chun beatha.”

Léiríonn an Ciste um Chothú na hÓige Cruthaithí tiomantas Éire Ildánach chun a chinntiú gur féidir le gach leanbh agus duine óg rochtain a fháil ar eispéiris chruthaitheacha ar ardchaighdeán, agus pobail á neartú agus comhoibriú á spreagadh ar fud an oileáin ag an am céanna.

Cuirfear tús leis na tionscadail rathúla sna míonna amach romhainn, rud a chruthóidh deiseanna nua do na mílte leanaí agus daoine óga páirt a ghlacadh sa chruthaitheacht, scileanna nua a fhorbairt agus naisc bhuana a thógáil tríd an gcultúr agus na healaíona.