Cruthaitheacht don tSláinte agus don Fholláine

Rachaidh naoi n-údarás áitiúla déag i gcomhpháirt le Feidhmeannacht na Seirbhíse Sláinte (FSS) chun tionscadail a sheachadadh ina n-úsáidtear cleachtais chruthaitheacha chun folláine an phobail a fheabhsú, lena n-áirítear trí chomhoibriú trasteorann. Áirítear leis na buaicphointí:

• Domhan Fíodóireachta: Uaschúrsáil Chruthaitheach Faisin Thar Theorainneacha agus Aoiseanna, faoi stiúir Chomhairle Contae Fhine Gall, tionscnamh an Oileáin Chomhroinnte idirghlúine lena nasctar Comhairle Daoine Scothaosta Fhine Gall, grúpaí óige agus eagraíochtaí comhpháirtíochta i dTuaisceart Éireann trí uaschúrsáil chruthaitheach faisin

• Sólás: An Ciorcal Cúraim Láir Tíre, faoi stiúir Chomhairle Contae Uíbh Fhailí, clár ealaíon pobail a thacaíonn le teaghlaigh, cónaitheoirí tithe altranais agus daoine a bhfuil tinneas foirceanta orthu trí fhilíocht, scríbhneoireacht chruthaitheach agus gníomhaíochtaí cruthaitheacha eile.

• Splanc Cruthaitheachta: Clár Ealaíon agus Folláine Óige Chontae Chorcaí, faoi stiúir Chomhairle Contae Chorcaí, ina mbíonn daoine óga idir 8-18 mbliana d’aois rannpháirteach, go háirithe iad siúd ó phobail imeallaithe agus ó phobail ar deacair teacht orthu, trí chleachtais chruthaitheacha dhigiteacha lena n-áirítear podchraoladh, códú agus beochan.

Pobail ar Oileán Comhroinnte a cheangal

Faoin snáithe Pobail Chruthaitheacha ar Oileán Comhroinnte, cuirfidh trí údarás áitiúla déag tionscadail trasteorann ar fáil lena gcothófar malartú cultúrtha agus naisc bhuana idir pobail Thuaidh agus Theas.

I measc na nithe seo, tá

• Cad é an scéal?, faoi stiúir Chomhairle Contae Mhaigh Eo, botháin na bhfear ó cheithre chúige na hÉireann a roinneann scéalta agus a dhéanann iniúchadh ar eispéiris chomhaimseartha na fearúlachta ar oileán comhroinnte.

• Pictiúrlann gan Amharc, faoi stiúir Chomhairle Contae Átha Cliath Theas, ag aontú pobail dalla agus pobail lagamhairc ag cruthú bunsaothair amharclainne fuaime do lucht féachana Thuaidh agus Theas.

• Siúlóidí Feirme, faoi stiúir Chomhairle Contae Liatroma i gcomhpháirtíocht le Fear Manach, feirmeoirí agus ealaíontóirí a thabhairt le chéile trasna na teorann mar gheall ar thalamh, timpeallacht agus oidhreacht chomhroinnte.

Agus an maoiniú á fhógairt aige, dúirt an tAire O’Donovan:

“Tá ríméad orm an infheistíocht shuntasach €3.7 milliún seo a fhógairt, rud a léiríonn ár dtiomantas i dtionchar claochlaitheach na cruthaitheachta ar shaol daoine. “Trí thacaíocht a thabhairt d’údaráis áitiúla agus do chomhpháirtithe pobail, táimid ag cumasú deiseanna cruthaitheacha atá inrochtana, cuimsitheach agus freagrúil do riachtanais na bpobal ar fud oileán na hÉireann. “Táim ag tnúth leis na tionscadail nuálacha agus chomhoibríocha seo a fhorbairt tríd an maoiniú suntasach seo lena n-áirítear €2.3 milliún i maoiniú d’Oileán Comhroinnte.”

Léiríonn an infheistíocht seo tiomantas leanúnach Chlár Éire Ildánach tacú leis an gcruthaitheacht mar spreagadh don fholláine, don chuimsiú agus don nasc pobail. Trí chomhoibriú le húdaráis áitiúla, pobail agus comhpháirtithe ar fud an oileáin, cruthóidh na tionscadail seo deiseanna fiúntacha do dhaoine dul i ngleic leis an gcruthaitheacht agus lena chéile ar bhealaí nua spreagúla.