Is tionscnamh ardleibhéil Straitéis Cultúir agus Cruthaitheachta Ros Comáin 2018 - 2022 a bhfuil d'aidhm uaillmhianach léi gnáthchuid de shaol an duine i Ros Comáin a dhéanamh den chruthaitheacht ionas gur féidir le muintir an chontae, ina saol príobháideach agus ina ndreamanna den phobal, iomlán ár gcuid cruthaitheachta a thabhairt chun cinn. Is clár cultúir atá in Éire Ildánach a leagadh amach chun maitheas an duine, an phobail agus an náisiúin a chothú.

Is é bun na cúise maidir leis an gclár go mbíonn beartaíocht cultúir ina shiocair le cruthaitheacht phearsanta agus cruthaitheacht chompántais agus go mbíonn toradh suntasach air sin maidir le maitheas an duine agus dea-thréithe tairbheacha torthúla an phobail. Tá príomhthábhacht á leagan i Ros Comáin mar théamaí ar an bhféiniúlacht, ar an gcultúr, ar an gcomhar agus ar an tsaoránaíocht ar fud an chontae agus idirnascadh á dhéanamh idir iad sin agus na cúig cinn de cholúin faoin gclár Éire Ildánach.

Tá ionadaíocht ar Mheitheal Cultúir Chomhairle Chontae Ros Comáin ag seirbhísí tábhachtacha de chuid an údaráis áitiúil, na seirbhísí ealaíon, leabharlannaíochta, oidhreachta agus pobail san áireamh, agus sin ag teacht le cur chuige an chomhair mar atá i gceist ar fud na tíre faoi Éire Ildánach. Táthar den chreideamh nach neamhathraitheach an cultúr, go mbíonn múnlú agus éabhlóid air go seasta síoraí. Táthar den tuairim gur cheart deis a bheith ag an uile dhuine na cláir a thapú, gur cheart oibriú i gcomhar, acmhainní a chur ar fáil dá chéile agus smaointe a chur sa timpeall ionas go gcruthaítear deiseanna don uile dhuine páirt a bheith acu i múnlú an chontae tríd an gcruthaitheacht. Táthar lánchinnte de gur mór le muintir Ros Comáin an chruthaitheacht de gach uile chineál.

Is fada lucht ealaíne, scríbhneoireachta agus cruthaitheachta ag cur shaoithiúlacht na ndaoine in iúl lena gcuid scéalaíochta, amhránaíochta, damhsa, deasghnátha, ceiliúrtha agus comórtha. Trí oibriú go fonnmhar le hÉire Ildánach, admhaíonn Comhairle Chontae Ros Comáin an ceangal idir an chruthaitheacht, an rannpháirtíocht agus acmhainní. Tugann an tionscnamh seo deis iliomad daoine a spreagadh chun teacht i láthair ar bhealaí iléagsúla ionas gur féidir smaointeoireacht nua a thabhairt chun cinn agus seanscéalta a athinsint.